പയ്യന്നൂരിൽ പട്ടാപകൽ തട്ടിക്കൊണ്ടുപോകാൻ ശ്രമം: ഓട്ടോഡ്രൈവർ അറസ്റ്റിൽ

പയ്യന്നൂർ : ഓട്ടോറിക്ഷയിൽ കയറിയ യാത്രക്കാരിയെ തട്ടിക്കൊണ്ടുപോകാൻ ശ്രമമെന്ന പരാതിയിൽ ഓട്ടോ ഡ്രൈവറെ പോലീസ് അറസ്റ്റ് ചെയ്തു. 

രാമന്തളി ചിറ്റടി സ്വദേശിയും പുഞ്ചക്കാട് കുറുങ്കടവിലെ താമസക്കാരനുമായ പുതിയപുരയിൽ ഷിജു(37)വിനെയാണ് പയ്യന്നൂർ പോലീസ് അറസ്റ്റ് ചെയ്തത്. കോടതിയിൽ ഹാജരാക്കിയ ഇയാളെ റിമാൻഡ് ചെയ്തു. 

കഴിഞ്ഞദിവസം ഉച്ചകഴിഞ്ഞ് മൂന്നോടെയാണ് പരാതിക്കാസ്പദമായ സംഭവം നടന്നത്. 

കൊറ്റിയിൽ ബസ്‌ കാത്തുനിന്ന 48-കാരിക്ക് ബസ് കിട്ടാതെവന്നതിനെത്തുടർന്നാണ് അതുവഴി വന്ന ഓട്ടോക്കാരനോട് പാലക്കോട് പോകണമെന്ന് ആവശ്യപ്പെട്ടത്. 

ചാർജ് പറഞ്ഞുറപ്പിച്ച് ഓട്ടോയിൽ കയറിയ യാത്രക്കാരിക്ക് ഡ്രൈവറുടെ സംസാരത്തിൽ പന്തികേട് തോന്നിയതിനെത്തുടർന്ന് ഓട്ടോ നിർത്താനാവശ്യപ്പെട്ടെങ്കിലും നിർത്തിയില്ലെന്ന് പരാതിയിലുണ്ട്.

ഒടുവിൽ കുറുങ്കടവിലെത്തിയപ്പോഴേക്കും ഇയാളുടെ ശല്യം കൂടുകയും ഓട്ടോയുടെ വേഗം കുറഞ്ഞ സമയത്ത് യാത്രക്കാരി ഓട്ടോയിൽനിന്ന് പുറത്തേക്ക് ചാടുകയുമായിരുന്നുവെന്നും പരാതിയിൽ പറയുന്നു.

 പരിക്ക് പറ്റിയ യാത്രക്കാരിയെ മറ്റൊരു ഓട്ടോ ഡ്രൈവറാണ് ആസ്പത്രിയിലെത്താൻ സഹായിച്ചതെന്നും യാത്രക്കാരി പോലീസിന് മൊഴി നൽകി. 

ഇതേത്തുടർന്നാണ് ഓട്ടോ ഡ്രൈവറെ പുന്നക്കടവിൽനിന്ന് പയ്യന്നൂർ എസ്.ഐ. പി.ബാബുമോൻ അറസ്റ്റ് ചെയ്തത്.